(Rennie)

I cumm nur usma chliina Dorf, wo t Küah uf t Strossa schiissen, Mischthüüfa näb viilna Hüüser meterhoch sprüüssen. Und t Lüüt gnüüssen t Stilli und dass t Minuta no a Stund isch, doch säg na um Gottes Willa nid, dass t Ärda rund isch, oder dass es a Grät, wo ma Mikrowella nännt, git und s scho Fraua im Parlament, bezüchigswiis as Parlament git. Denn zu fortschrittlichi Erkänntnis und moderni Wüssaschaft Stosst uf grossi Verwirrig binara Gsellschaft, wo nid viil meh kännt als Ackerbau und Viehzucht. I vergliich miis Dorf und Fortschritt mit USA und Schwiibucht. As chann aifach nid goh! Vu Afang a zum Schaittara verurteilt, als ob öppert für dia ganz Gmaind über alls Neua Zensur lait. Grad wäg däm Urteil frog i mi no bis hüt, wias HipHop überhaupt bis do herra gschafft hät. Är muass sich wohl verloffa ha oder wiideramol gsoffa ha, oder ufem Wäg zumna grossa Ding an Kumpel troffa ha. Uf all Fäll hät är siini Spuura hinterloh, wemma bedenkt, dass do jeda zwait Jugendlich Baggies trait und künschtlich hinkt. Doch das Ganza stinkt; Chinderlähmig grassiart nümm so wia früahner. Und bi Bonzasöhn im Ghetto-Look lachen sogar t Hüahner. HipHop isch für sii wia t Dolly Buster für an Büstahalter: Aifach a Nummara z gross! Wia t Pescht im Mittelalter Sind au sii an zimmli läschtiga Näbaneffäkt, und wären t Wu Tang-Tags uf da Parkbänk no so fätt! Vu nüüt chunnt nüüt! Das gilt vor allem, wemma nid grad in New York wohnt, sondern wia miar am Arsch vur Wält! Ma frogt sichs, ob sichs lohnt zum räppa, zumal nid Afro-Amerikaner. Bin nid im Ghetto ufgwachsa und miin Alltag isch profaner Als dä vumna Verträtter. Bin nid arm und trotzdem räppi! Vor allem spiil i kai Theater vor wia t Ursula Schäppi, denn i hans nid nötig, bös z luaga, känn kai Slum-Geschta. Bin laider zfaig für as Gang-Tatoo! Wär chann mi tröschta?! Schad, han i nur a paar Fründa und kai Brotherhood. Bin nia high und allgemein nid so cool wia iar, doch säga luut: "Miar chönnts nid besser goh, beschwära will mi nid! Doch i verstohn das Ganza, eh, und züüch nid aifach mit!"

... Link